நண்பன் [U] (2012)

இந்த வருடத்துக்கான முதல்பதிவே சினிமா விமர்சனம்தானா?  என்று லேசாக உருத்தினாலும் கூட ஆல் இஸ் வெல்தான்!!

பாஸிடிவ்வான ஒரு பதிவோடுதானே வருடத்தைத் துவங்கணும்... அதைவிட சூப்பர் பாஸிடிவ்வான இந்த ஷங்கர் படத்தைக் கொஞ்சம் ஸ்லாகித்துவிட்டு இந்த வருடத்துடைய கணக்கைத் துவங்குவதில் எனக்கு மகிழ்ச்சியே!!!!

"ரீ" என்கிற ஒற்றைத் தமிழ் எழுத்தை மட்டும் மனதிலிருந்து அழித்துவிட்டு ரசித்து மகிழ வேண்டிய ஓர் அழகிய திரை அனுபவம்!
 "ரீ-மேக்கிங்" என்கிற வார்த்தையில் உள்ள "ரீ"யைத் தான் சொல்கிறேன்! அழித்துவிட்டுப் பார்த்தால் இந்தப் பொங்கலுக்கு விஜய் வைபவம்தான்!

"3 இடியட்ஸ்" என்னும் ஓர் அற்புதமான படைப்பைத் தனது கைகளால் மீண்டும் படைத்திடும் வாய்ப்பை ஷங்கர் தன் நகமும் தீண்டாது, ரேகையும் படியாது தொட்டும் தொடாமல் தூக்கிச் சுமந்து  அழகுபடுத்திக் கொடுத்திருக்கிறார் இன்னும் இன்னும் அழகாக.....!!

இரண்டொரு மாற்றத்தை செய்துகொண்டு திரைக்கதை, இயக்கம் என்று தன் பெயரைப் போட்டுக்கொள்ளாமல்..... வெறும் இயக்கம் - ஷங்கர் என்று டைட்டில் கார்டு போட்டு அப்படியே அச்சு அசலாக ஒரிஜினலை ரீமேக்கி இருக்கும் ஷங்கரின் இந்த நேர்மைதான் அவரின் இந்தப் படவெற்றிக்கு சீக்ரெட் மற்றும் ஷார்ட் கட்!

ஒரு தேர்ந்த திரைக்கதையாக "த்ரீ இடியட்ஸ்" தாங்கி வந்த அந்த "இன்ஸ்பைரிங் இன்ஃபர்மேஷன்" எந்தவொரு மனிதனுக்கும் மனதின் மைலேஜைக் கூட்டும் ஒரு மந்திர மருந்தாகிவிடுவதில் ஆச்சர்யம் எதுவும் இருக்கப்போவதில்லை....... ஏனெனில் மொழி தாண்டி, இனம் தாண்டி, மதம் தாண்டியும் வீரியமாய் இதயத்துக்குள் பாயும் இந்த "ஆல் இஸ் வெல்" அப்ரோச்!!! அநேகமாக இந்த யுனிவர்சல் தத்துவத்தை அடித்தளமாகக் கொண்டுதான் ஷங்கர் தைரியமாகக் களம் கண்டிருப்பார் என்று நினைக்கிறேன்.... அவருக்குத்தான் நன்றாகவே தெரியுமே "இன்ஃபர்மேஷன் இஸ் வெல்த்" என்று!!

அமீர்கானாக விஜய்!...... விஜய்யிடம் "நடிப்பை" யெல்லாம் யாரும் எதிர்பார்ப்பதில்லை இருந்தாலும் தான் ஏற்றுக்கொண்ட கதாபாத்திரமாகப் படம்முழுக்கத் திரையில் சரளமாக உலவும் வரையில் தன்பங்குக்குக் பங்கம் வராதவாறு பார்த்துக்கொள்ளத் தெரிந்தவர் அவர்...... எப்படி "போக்கிரி"யில் மகேஷ்பாபுவின் காஸ்ட்யூமில் இருந்து மேனரிஸம் வரைக்கும் அப்படியே இமிடேட் செய்தாரோ அதேபோல்தான் இங்கு ரான்சோவை (அமீர்கான்) அப்படியே உள்வாங்கிக்கொண்டு பாரியாக அவதனித்திருக்கிறார்.... இருந்தாலும் இயல்பாகப் பல இடங்களில் மிளிர்கிறார் விஜய் என்பது பொய் அல்ல...... க்ளைமேக்ஸ் காட்சியில் விஜய்யின் உடல்மொழி மிக மிகக் கச்சிதம்..... (சத்தியமாக முதன்முறையாக விஜய் நடிப்பில் பாடிலாங்குவேஜ் பற்றியெல்லாம் பேசுவதாய் உணர்கிறேன்!) எல்லாவற்றிற்கும் மேலாக இந்த ரோலைத் தமிழில் விஜய்யால் மட்டுமே செய்ய முடியும் காரணம் நாற்பது வயதிலும் அவர் மெய்ன்டைன் பண்ணும் அந்த டீன்-ஏஜ் உடல்வாகு..... துறுதுறுவென ஜீவா, ஸ்ரீகாந்துடன் ஒன்றாக வலம் வந்ததில் ஃபிட்னஸ் புத்தகம் எழுதியிருக்கிறார் விஜய்...... கிரேட் ஜாப்! விஜய்யை ரசித்தேன் "கில்லி"க்கு அடுத்தபடியாய்!

ஜீவா.... ரெண்டு ஸ்கொயர் ஃபீட் இடம் மட்டுமே கிடைத்தாலும் கிடைச்சதில் வீடுகட்டி விளையாடியிருக்கிறார்.... செம ஸ்கோரிங் பை சௌத்ரி மகன்! ஷர்மான் ஜோஷியின் பாத்திரத்தைக் கேட்டுவாங்கிக் கொண்டதாக சொன்ன ஜீவா, ஒரிஜினலில் ஷர்மானின் ஸ்க்ரீன் ஸ்பேஸை டபுள் ட்ரிபிளாக்கிப் பயன்படுத்திக்கொண்டிருக்கிறார்.... குறிப்பாக அந்தக் குடிபோதையில் குளறும் காட்சி..... விஜய்யும் ஸ்ரீகாந்தும் "நடித்த" அந்தக் காட்சியில் படு இயல்பாய் வெளிப்பட்டிருப்பார் ஜீவா.....ரொம்பவே அநாயசமாக நடிப்பு கைகூடுகிறது ஜீவாவுக்கு! பலருக்கு த்ரீயில் பிடிக்கப்போவது இந்த நம்பர் டூ வைத்தான்!

ஸ்ரீகாந்த்..... குறையே சொல்லிவிட முடியாத பெர்ஃபார்மென்ஸ்.... எப்படியாவது ஒரு கம்பேக் ரவுண்ட் வந்திடவேண்டும் என்ற வேகம் ஒவ்வொரு ஃப்ரேமிலும் தெரிகிறது.... பொதுவாகவே இவர் சொதப்பும் வாய்ஸ் மாடுலேஷன் சம்பந்தப்பட்ட ஏரியாக்களில் ஸ்ரீகாந்தா என்று நம்ப முடியாத அளவு அழுத்தமான ரொம்பவே மெச்சூர்ட் டயலாக் டெலிவரி..... மேலும் புருவத்தைத் தூக்கிக்கொண்டு ஓவர் எக்ஸைட்டடாக இவர் நடிப்பதும் எரிச்சல் ரகமாக இருக்கும் பட் இந்தப் படத்தில் ஒரு ஸீனில்கூட பழைய ஸ்ரீகாந்த்தைப் பார்க்கவே முடியாதது சந்தோஷமான ஆச்சர்யம்..... அடுத்தப்படம் என்று நிச்சியம் ஒன்று வரும் அதில் ஷங்கர் இல்லாமல் ஜெயிக்கணும் பாஸ் நீங்க..... பார்த்து செலக்ட் பண்ணுங்க...............!

இலியானா.... கரீனா செய்த வேடத்தைத் தமிழில் செய்ய அழகும், அந்தப் பேசும் விழிகளும் இருந்தால் போதும் என்றால் எந்தவொரு நடிகைக்கும் பொருந்தியிருக்கக் கூடிய ரோல்தான்... ஆனால் அதையும் தாண்டி கரீனாவுடைய "கெத்"தை இயல்பாய் மெய்ன்டைன் செய்தவிதத்தில் கெத்தாக ஜெய்த்திருக்கிறார்!..... அனுயா ஏற்கெனவே தான் ஒரு தைரியமான நடிகை என்று நிரூபித்த ப்ரூவன் ஆர்டிஸ்ட்..... குட்டியூண்டு ரோலிலும் க்யூட் பெர்ஃபார்மென்ஸ்.....

சத்துராக சத்யன்...... ரொம்ப ரொம்ப ரொம்ப எதிர்பார்க்கப்பட்டவர் இவர்தான்! மொழுமொழு ஸாடிஸம்..... வாவ்... ரொம்பவே மெனக்கிட்டு பெர்ஃபெக்ஷன் காட்டியிருக்கிறார்..... அந்த "கற்பழிப்பு - கலவி" சொற்பொழிவிற்கு தியேட்டரே எழுந்து நின்று சிரிக்கின்றது...... இருந்தாலும் சத்துருக்கு இருந்த பெரிய ப்ளஸ் பாயிண்ட் சத்யனுக்கு கிடைக்காமல் போனதுதான் துரதிர்ஷ்டம்.... சத்துராக நடித்த ஓமி வைத்யா ஒரு புதுமுகம்... சத்யனோ நமக்கு நன்றாகவே அறிமுகம்!!
அதுதான் ப்ரச்னை.... அவ்வளவு அசாதாரணமாய் நடித்து வித்தியாசம் காட்டியிருந்தாலும் சாதாரண சத்யன் மனதைவிட்டு அகலமறுப்பது மட்டுமே சத்யனின் உழைப்பைப் பாதி இன்விஸிபிள் ஆக்கிவிடுகிறது! பட் சத்துருக்குத் தான் ரைட் சாய்ஸ் என்பதை ஆழமாகவே பதித்திருக்கிறார்.....

"தி புர்ச்சி டமிளியன்" சத்யராஜ்.... இந்தப் படத்தில் போமன் இராணியின் வேடத்தில்ஜஸ்ட்  "இவர்களுடன்" சத்யராஜ்!!
வெல்..... சத்யராஜ் ஒரு தேர்ந்த நடிகர்.... அவருக்கு ஹீரோ வேடம் போனாலும் நடிக்குமளவில் இந்த மாதிரி எத்தனை சேலஞ்சிங் ரோல் கொடுத்தாலும் அஸால்ட்டாக ஸ்கோர் செய்வார்...... சுட்டுப்போட்டாலும் இவருக்கு வராத இங்க்லீஷ் ஆக்ஸெண்டைக்காப்பாற்ற அந்த மொத்த நாக்கு வசனவெளியீடு உதவியிருக்கிறது.... நல்ல நடிகர்யா...... நடிப்பாருல்ல!!! விஜய்யிடம் தன் ப்ரெஸ்டீஜ் பேனாவைக் கொடுக்கும் ஸீனில் மை நேம் இஸ் சத்யராஜ் என்று ஆட்டோகிராஃப் போட்டிருப்பார்!! வெல்டன் சார் உங்ககிட்ட இருந்து இன்னும் நிறைய எதிர்பாக்குறோம்!

ஹாரிஸ் இசை ரொம்ப பிடிச்சது...... "ஹார்ட்டிலே பேட்டரி"பாடலில் முத்துக்குமாரின் ஸ்பெஷல் லிரிக்ஸுக்கு ஹாரிஸின் ட்யூன் க்ராண்ட் கிஃட்! பாடல்களைத் தாண்டிப் பின்னணி இசையில் கதையோட்டத்தில் இசைவசனம் எழுதியிருக்கிறார்! மனோஜ் பரமஹம்சாவின் ஒளிப்பதிவு ஷங்கரின் பேக்டிராப் எஞ்சினியரிங்கில் திரையை ஒவ்வொரு கணமும் டெக்கொரேட் செய்து மகிழ்விக்கிறது.... ஷங்கரின் கலர்களும் ஈடுஇணையில்லாத ப்ரொடக்ஷன் டிஸைனிங்கும் மனோஜின் கேமராவில் ஜில் ஜில்லென்று பதிவாகியிருப்பதில் உலகமே ஆல் இஸ் வெல்லாகத் தெரிகிறது! ஆண்டனியின் படத்தொகுப்பைத் தான் எல்லா படத்திலும் புகழ்கிறோமே..... இந்தப் படத்திலும் க்விக் ஃபிக்ஸ் டெக்னாலஜியில் கலக்கியிருக்கிறார்!  எல்லாரும்தான் ஃபாரினுக்குப் போய் பாட்டு ஷுட் பண்றாங்க ஆனாலும் ஷங்கர் தேர்வு செய்யும் இடங்களும் அதைப் ப்ரெசண்ட் செய்யும் விதமுமாகத் தனியாகத் தெரிகிறது... பாடல்களின் படமாக்கல் நிச்சியமாக ஒரு வாவ் அனுபவம்! கார்க்கியின் வசனங்கள் படு ஷார்ப்... "திருக்குறள் சைஸுல ஒரு ஃப்ளாஷ்பேக்கையே சொல்லிட்டான் பாருன்னு" சொல்லுறதெல்லாம் சூப்பரோ சூப்பர் டச்!

மீண்டும் சொல்கிறேன்..... "ரீ" என்னும் எழுத்தை மட்டும் மனதிலிருந்து அழித்துவிட்டால் ஷங்கரின் மேக்கிங்மும் அந்த உழைப்பும் புரியும்..... இந்த ரீமேக்கிற்கு ஷங்கர் தேவையா? என்று பலரும் கேட்டாலும்.... என் கண்களுக்கு த்ரீ இடியட்ஸிலிருந்து ஷங்கர் தமிழுக்கு எடுத்துக் கொண்டுவந்திருக்கும் அந்த அழகான மெசேஜ் மட்டுமே தெரிகிறது.... புறா விடு தூது போல "ஆல் இஸ் வெல்" என்று எழுதிய சீட்டை ஷங்கர் என்னும் கழுகு தன் கால்களில் கட்டிச் சுமந்து கோடம்பாக்கம் கொண்டுவந்து சேர்த்திருக்கிறது!!

நண்பன் - குறையொன்றுமில்லை...... ஆல் இஸ் வெல்!!!!!

அன்புடன்,

பிரபு எம்