மன் மதன் அம்பு [U] (2010)

புதிதாகப் படமெடுப்பவர்கள் சிலர் சிலசமயங்களில் நல்ல வித்தியாசமான கதையை எடுத்துக்கொண்டுகிளம்பி வழியில் தடுமாறி ஏதேதோ செய்து பூசி முழுகி ஒருவழியாகப் படத்தை முடித்துவைக்க, ரசிகர்களாகிய நாமும் நல்ல முயற்சியென்று காம்ப்ரமைஸ் செய்துகொண்டு நல்ல விஷயங்களை மட்டும் பாராட்டி வருவோமல்லவா அதுபோன்றதொரு காம்ப்ரமைஸை இங்கே கோரியிருப்பவர்கள் தமிழ்சினிமாவின் பழம்தின்று கொட்டைபோட்ட சீனியர்கள் கமலும் கே எஸ் ரவிகுமாரும் என்பதுதான் சோகம்!

நல்ல கதை... நல்ல களம்... திரைக்கதையும் ஃபர்ஸ்ட் ஹாஃப் முடிந்து "நீலவானம்.." பாடல் வரைக்கும் எல்லாமே அழகுதான்..... ஆனால் அதற்குப்பின் ஏனோ திடீரெனக் கதாபாத்திரங்கள் கோமாளி வேஷம் போட்டுக்கொண்டுத் தங்களைத் தாங்களே கலாய்த்துக்கொண்டு.... மொத்தமாக நம்மையும் கலாய்த்து எடுத்து முடித்துக் கெடுத்து வைக்கிறார்கள் நல்லதொரு படத்தை.....

ஒரு நடிகையை ஒரு பணக்காரப் பையன் காதலிக்கிறான்.... அவர்கள் திருமணம் செய்துகொள்ளப் போகிறார்கள்... அந்த நடிகை "அம்பு"வின் பாத்திரம், காதலன் "மதனி"ன் மனம், அவனுடைய அப்பா அம்மாவின் மனநிலை, இருவருக்கிடையிலான‌ மனப்போராட்டம் போன்ற விஷயங்களையெல்லாம் மிக நிதானமாக கேமராகோணங்களாலும், வசன விளையாட்டுகளாலுமே நிதர்சனமாக‌ வெளிப்படுத்திக் கதையை அடுத்த கட்டமான‌ கப்பல் பயணத்துக்குக் கவனமாக நகர்த்தியது ரசனை!...... பாரிஸில் த்ரிஷாவை வரவேற்கும் தோழி சங்கீதா...அவளின் விவாகரத்து...ஜீவனாம்சம்... இருகுழந்தைகள் மற்றும் இடையிடையே பளிச்சிடும் சின்னச் சின்ன கிச்சுகிச்சுகள் சுவாரஸ்யம்!...... நிஷாவை வேவு பார்க்க மாதவன் பணியமர்த்திய மேஜர் ஆர். "மன்"னாராகக் கமல்ஹாசனின் அட்டகாசமான என்ட்ரி! ....... இந்த அசைன்மெண்ட்டை மேஜர் ஏற்றுக்கொண்டதற்கான அழுத்தமான காரணம் என ஃபர்ஸ்ட் ஹாஃப் பவர்ப்ளேயில் எல்லாமே பவுண்டரிகள்தான்!

கதையிலேயே இவ்வளவு ஸ்கோர் செய்துவிட்டபின்னும் திரைக்கதையிலும் சிக்ஸர் அடிக்கிறார்கள், த்ரிஷா‍‍‍ - மாதவன் யதார்த்தமாக செய்யும் ஒரு கார் விபத்தின் அடுத்த முனையில் தன் வாழ்க்கையையே இழந்தவன்தான் இந்த Dull Face மன்னார் என்று ஓர் அற்புதமான முடிச்சையும் வைத்து! ..... இப்படி செம Grand-டாகப் பார்சல் செய்து முதல்பாதியை முடிக்கிறார்கள்....

இரண்டாம் பாதியில்தான் இரண்டாயிரத்தி பத்தின் சிறந்த பாடல் காட்சியமைப்பு என்று சிலாகிக்குமளவு ஆகச்சிறந்த "நீ...லவானம்.. நீ..யும் நா..னும்" பாடலும் வருகிறது... !! ஒரு காதலின் ஒட்டுமொத்த கதையையுமே ரிவர்ஸில் கொண்டுபோய் முதல் சந்திப்பில் முடித்த அந்த ஹெவன்லி மெலடிக்குக் கண்கலங்க கைதட்டி ஓய்ந்தபோது "இந்தப் படத்தையா இப்படி விமர்சிக்கிறார்கள்??" என்றுகூட நினைத்தேன்!

கதைப்படியே ஏகப்பட்ட இக்கட்டுகளுக்குள் சிக்குண்டு கண‌த்த இதயமும் மென்சோக முகமுமாய் அவ்வப்போது வலிமறைத்துப் பேசிச் சிரிக்கவைக்கும் கமல்ஹாசன்..... வெறும் Webcamல் மட்டுமே மொட்டைத் தலையாய், வலியும் வாந்தியுமாகத், தோன்றி இதயங்களைக் கணக்க வைக்கும் கேன்சர் நோயாளியாக‌ ரமேஷ் அரவிந்த்.... தாலியைக் கையில் இருகப் பற்றிக்கொண்டு மரணபயத்தை முகத்தில் பச்சைக் குத்திக்கொண்டு க்ளோஸ் அப்பில் அசத்தியிருக்கும் ஊர்வசியென்று அழுத்தப் பின்னணியில் மாதவனின் வில்லத்தனமான பணத் திமிருக்குப் பலியாவது அப்பழுக்கற்ற‌ த்ரிஷாவின் நடத்தை என்று ஓர் உலகசினிமா ரேஞ்சுக்கு சிக்கல்களைக் கலர்ஃபுல் கேன்வாசின் பின்னணியில் கதை
 கோர்த்தவர்கள்..... கதையைப் போகிறபோக்கிலேயே பிரச்னைகளை சந்திக்கவிட்டு... கமல்-த்ரிஷா காதலை இடம்பார்த்துப் பூக்கவைத்து... கமலின் பணப்பிரச்னையைத் தீர்த்திருந்தால்கூட நிறைவான படமாக மிளிரியிருக்கும் மன் மதன் அம்பு... 

அதைவிட்டு யாருக்கு என்ன பிரச்னையோ... கதை வேகமெடுக்க மிகச்சரியான நேரத்தில் வில்லன் மாதவனைக் குடிகாரக் கோமாளியாக்கி.... காமெடியன் ஃப்லிம் ப்ரொடியூசரைக் கதையில் கதாபாத்திரமாக்கி, சங்கீதா‍-கமல் காமெடி லூட்டிகள் என்று படு நாடகத்தனமாகக் காட்சிகள் அமைத்து ஓர் அமெச்சூர் மேடை நாடகமாய் பக்கம் பக்கமாய் வசனம் பேசி படுசாதாரணமாய்ப் படத்தை முடித்து ஓட்டுக் கேட்டுவந்த எம் எல் ஏ மாதிரி பல்லைக் காட்டி இளித்து நிற்கிறார்கள் கமலும் கே எஸ் ரவிகுமாரும்... :‍-(

ரொம்ப ரொம்ப அலட்சியமான திரைக்கதையினால் மனுஷ் நந்தனின் ஒளிப்பதிவு, ஷானின் எடிட்டிங், தேவி ஸ்ரீ பிரசாத்தின் இசை என்று எதையுமே பாராட்டிப் புண்ணியமில்லை!

அருமையான ஒரு கதையை வீணாக்கிவிட்ட குற்றஉணர்ச்சி கொஞ்சமும் இல்லாமலா விஜய் டிவியோடு சேர்ந்துகொண்டு "தகிடதத்தோம்" போட்டார் கமலஹாசன் படத்தின் ப்ரமோஸ்களில்?? வெறும் மார்க்கெட்டிங்கும் ப்ரொமோஷன்களும்....ஸ்டார் கேஸ்டிங்கும்... அறிவுஜீவித்தனங்களும் படத்தைக் காப்பாற்றிவிடாது என்பதைக் கமல் புதிதாக உணரத் தேவையில்லை.... நிரூபித்திருக்கிறார் (!)  என்றுதான் சொல்லவேண்டும் யாருக்கு என்றால் யாருக்கோ தான்!! :-(

மன் மதன் அம்பு - Not a Pointed Cupid's arrow... Disappointingly ends as a Stupid throw.. :-(

வருத்தத்துடன்,

பிரபு எம்